‘दिमाग खराब’ लाई मिल्यो बलियो ‘वर्ड अफ माउथ’

फिल्म । गत शुक्रबारदेखि प्रदर्शन भएको नेपाली फिल्म ‘दिमाग खराब’ले शनिबारको बिहानी शोमा ४५ प्रतिशत दर्शकको साथ पाउँदा साँझसम्म पुग्दा शतप्रतिशत अकुपेन्सी सहित हाउसफूल दर्शकको साथ पाएको छ । तिहारको अवसर पारेर प्रदर्शनमा गरिएको फिल्मको शनिबार अधिकांश हलका अनलाइन साइटमा हेर्दा बिहानदेखि रातीसम्मका शोमा दर्शकको चाप देखिएको हो । शनिबार बिहानी शोबाटै हाउसफुलका दर्शकसहित फिल्म हेर्ने भिड हलमा देखिएको छ । निर्माण टिम शनिबार बिहानी शोबाट नै कलाकार खगेन्द्र लामिछाने, स्वस्तिमा खड्का, सुमन कार्की, कार्यकारी निर्माता सुरज बम ठकुरी र निर्देशक निश्चल बस्नेत दिनभर राजधानीका विभिन्न हलमा पुगेर दर्शकसँग साक्षात्कार गरेको थिए ।

निर्देशक निश्चल बस्नेतले शुक्रबार सुखद् अकुपेन्सी पाएपनि दर्शकबाट राम्रो ‘वर्ड अफ माउथ’ मिलेकाले शनिबार हलमा दर्शकको चाप उच्च देखिएकाले आइतबारबाट परेको तिहारको बिदामा ‘दिमाग खराब’ले राम्रो व्यापार गर्ने विश्वास सहित मनको डर हटेको बताए ।

निर्देशक बस्नेतले ‘दिमाग खराब’को ब्यस्तता सकिएपछि आफू अर्को प्रोजेक्टमा ब्यस्त हुने बताए । निर्माणमा ग्याप नराख्ने र अर्कोवर्ष सम्भवत अर्को फिल्म ल्याउने प्रयास रहने उनले बताए । ‘दिमाग खराब’को सिक्वेल ल्याउने बिषयमा उनले भने, ‘सिक्वेल आवश्यकता अनुसार बनाउने हो । यसले राम्रो गर्यो अब सिक्वेल बनाउनुपर्छ भन्ने मलाई लाग्दैन । मलाई केही नयाँ चीज बनाउनुपर्छ भन्ने लाग्छ ।’

वैकल्पिक राजनीति र स्वतन्त्र उम्मेदवारको पक्षधरता लिएको भन्ने कतिपय टिप्पणीलाई निर्देशक बस्नेतले अस्वीकार गरेका छन् । ‘फिल्ममा एकजना स्वतन्त्र उम्मेदवार उठेको हुनाले सबै त्यतैतिर मात्र जोड्नुपर्छ भन्ने छैन । कसैले पनि भ्रष्टाचारविरुद्ध आवाज उठाउनु भनेको रिभोलुसन पनि हो’, निर्देशक बस्नेतले भने । यसले भ्रष्ट मान्छे रहुञ्जेल सर्वसाधारणले उसको विरुद्ध आफूलाई उभ्याउनुपर्ने सन्देश दिने निश्चलले बताए ।

अभिनेता खगेन्द्र लामिछानेले ‘दिमाग खराब’लाई दर्शकले रुचाएकोमा सम्पूर्ण दर्शकलाई धन्यवाद दिए । निश्चलले ६ वर्षपछि निर्देशन र आफुले ५ वर्षपछि लिड रोलमा काम गरेकाले दर्शकको सर्पोट र माया आवश्यक रहेको अभिनेता लामिछानेले बताए । उनले चाडपर्वमा स्वदेशी फिल्म हेर्न जरुरी रहेको उनले बताए ।

‘हाम्रो सिनेमालाई ग्रो गराउनलाई अरुको सिनेमा हेरेर हुँदैन । यो ध्रुवसत्य कुरा हो । तीतो लाग्ला तर आफ्नो सिनेमा आफै हेर्ने हो । यहाँको उत्पादन किन्नुभयो भने त्यो ग्रो हुन्छ । देश त्यसरी बन्ने आधार निर्माण हुन्छन् । त्यसकारण आफ्नो चाडबाडमा आफ्नो सिनेमा हेरौं’, खगेन्द्रले भने ।

अभिनेत्री स्वस्तिमा खड्काले फिल्म हेरेका दर्शकबाट राम्रो प्रतिक्रिया पारेका र धेरै दर्शक दोहो¥याएर परिवार सहित हलमा आएको पाएको बताइन् ।‘शनिबार हामी बिहानैदेखि काठमाडौं उपत्यकाका धेरै हलमा पुगेका छौं । सवैतिर दर्शकले मन परेको बताइरहनु भएको छ’, स्वस्तिमाले भनिन् । हल रिपोर्टको क्रममा पत्रकारले अभिनेत्री खड्कालाई उनको भुमिकाबारे पाएको प्रतिक्रियाका बिषयमा सोधेका थिए । जवाफमा अभिनेत्री खड्काले दर्शकले सचि पात्रलाई निकै माया गरेको भन्दै खुशी व्यक्त गरिन् । आफुले काम गरेका हरेक फिल्मको चरित्रलाई दर्शकले मन पराई दिँदा आगामी दिनमा अझै चुनौती पूर्ण भुमिकामा काम गर्न हौसला मिल्ने स्वस्तिमा बताउँछिन् ।

कलाकार सुमन कार्कीको क्यारेक्टरले पनि दर्शकबाट राम्रो प्रतिक्रिया पाएको छ । पहिलो पटक फिल्ममा काम गरेकाले पनि दर्शकबाट पाएको माया र साथ प्रति आभारी रहेको बताए । कलाकारको रुपमा यसरी दर्शकमाझ उपस्थित हुन पाउँदा आनन्दको अनुभूति सहित अर्कै संसारमा पुगेको महशुस गरेको छु । भोलीमा दिनमा ‘दिमाग खराब’लाई लिएर दर्शकमा उत्साह अझै बढ्ने विश्वास उनको छ ।

दर्शक साक्षात्कार गर्न कलाकारसहित निर्माण टिम हलमा पुग्दा दर्शकको हुटिङ पाउनुका साथै कलाकारसँग सेल्फी खिच्न चाहने दर्शकको चाप निकै देखिएको थियो । फिल्म हेरर हलबाट निस्किँदै गर्दा अधिकांश दर्शकले निर्माण टिमसँग ‘दिमाग खराब’को सिक्वेलको डिमाण्ड गरिरहेका थिए ।

सिनेमा आर्ट्स र ब्ल्याक हर्स पिक्चर्सको निर्माण रहेको फिल्ममा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको पनि अभिनय छ ।

निर्देशक निश्चल बस्नेत र अभिनेत्री सुपुष्पा भट्ट पनि सिनेमाको एक गीतमा विशेष भुमिकामा देखिएका छन् । आकाश बरालको लेखन र मनोज पण्डित स्क्रिप्ट डाक्टर रहेको फिल्म राजनीतिक विषयमा केन्द्रित रहेर निर्माण भएको हो । फिल्ममा रौनक विक्रम कडेल निर्माता र सुरज बम ठकुरी कार्यकारी निर्माताको रुपमा रहेका छन् । यसमा सुशन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।

कमेन्ट गर्नुहोस्