फिल्म । निर्देशक कार्तिक गट्टामनेनीको नयाँ फिल्म ‘मिराई’ मा भारतीय पौराणिक कथा र आधुनिक सुपरहिरो फिल्मलाई जोड्ने प्रयास गरिएको छ । करिब ६० करोड भारतीय रुपैयाँको बजेटमा बनेको यो फिल्मलाई उत्तर भारतमा करण जोहरको धर्मा प्रोडक्सन्सले वितरण गर्दैछ ।यस फिल्मको कथा परम्परागत लडाइँमा आधारित छ, जसलाई भारतीय पौराणिक तत्वहरूले जोडेका छन् ।
‘हनु-म्यान’ को सफलतापछि तेजा सज्जाले यस फिल्ममा ‘सुपर योद्धा’ को मुख्य भूमिका निभाएका छन् । उनी सम्राट अशोकका नौ पवित्र ग्रन्थहरूलाई ‘ब्ल्याक स्वर्ड’ बाट बचाउने जिम्मेवारी पाएका पात्र हुन् । सामाजिक सञ्जालमा उनको भूमिकाको निकै चर्चा भइरहेको छ । मन्चु मनोजले यस फिल्ममा खलनायक ‘ब्ल्याक स्वर्ड’ को भूमिका निभाएका छन् । उनी सुपर योद्धाको विरुद्धमा उभिएर पवित्र ग्रन्थहरू हात पार्न खोज्छन् ।
यस फिल्ममा ऋतिका नायक, श्रिया सरन, जगपति बाबु र जयराम जस्ता कलाकारहरू पनि महत्त्वपूर्ण भूमिकामा छन् । ‘मिराई’ को कथा एउटा सामान्य मानिसको वरिपरि घुम्छ, जसलाई ‘सुपर योद्धा’ को रूपमा चुनिएको छ । उसको मुख्य जिम्मेवारी भनेको सम्राट अशोकका नौ पवित्र ग्रन्थहरूलाई भयानक खलनायक ‘ब्ल्याक स्वर्ड’ बाट बचाउनु हो । कथाले उसले आफ्नो भाग्य स्वीकार गरी चुनौती सामना गरेको देखाउँछ, जुन अन्ततः सत्य र असत्यको ठूलो युद्धमा परिणत हुन्छ ।
फिल्म ‘मिराई’को दोस्रो चरणको छायांकन नेपालमा समेत गरिएको थियो । काठमाडौं, भक्तपुर, कीर्तिपुर, दोलखा, पोखरा र मुस्ताङ लगायतका रमणीय दृश्य फिल्ममा कैद गरिएको छ ।
