फिल्म । भारतीयअभिनेता अक्षय कुमारले ‘हाउसफुल ५’ को ट्रेलर सार्वजनिक कार्यक्रममा पहिलो पटक ‘हेराफेरी ३’ को विवादबारे खुलेर बोलेका छन् ।अभिनेता परेश रावलले ‘हेराफेरी ३’ छाडेपछि उत्पन्न विवादले सामाजिक सञ्जाल र मिडियामा तहल्का मच्चाएको छ । अक्षयले परेश रावलको बचाउ गर्दै उनलाई आफ्नो लामो समयको सहयात्री र महान अभिनेता भनेका छन् ।
‘मेरो सहकलाकारलाई ‘मूर्ख’ जस्ता शब्द प्रयोग गर्नु गलत हो । मैले परेश रावलसँग ३२ वर्षदेखि काम गर्दै आएको छु । उनी उत्कृष्ट अभिनेता हुन् र म उनबाट धेरै कुरा सिक्छु’, अक्षयले भने । उनले यो विषय गम्भीर भएकाले अदालतमा समाधान हुने बताए ।
‘हेराफेरी ३’, अक्षयको लोकप्रिय फ्रान्चाइजीको तेस्रो भाग, विवादको केन्द्रमा छ । परेश रावलले फिल्मबाट अचानक हात झिकेपछि यो विवाद सुरु भएको हो। अक्षयको प्रोडक्सन हाउस, केप अफ गुड फिल्म्सले परेशलाई २५ करोडको क्षतिपूर्ति दाबी गर्दै कानुनी नोटिस पठाएको छ । अक्षयको टिमले परेशले सुटिङ सुरु भइसकेपछि फिल्म छाड्दा ठूलो आर्थिक नोक्सानी भएको दाबी गरेको छ ।
निर्देशक प्रियदर्शनले पनि परेशको निर्णयले अक्षय र टिमलाई भावनात्मक र आर्थिक क्षति पुगेको बताएका छन् । ‘सबै सम्झौता भइसकेको थियो। १० दिनअघि अक्षय, सुनिल शेट्टी र परेशले एक दृश्य र आईपीएल टिजर सुटिङ गरेका थिए। परेशको यो निर्णयले अक्षय स्तब्ध भए’, निर्देशक प्रियदर्शनले भने ।
यता, परेशले सामाजिक सञ्जालमा आफ्नो निर्णय पटकथासँग मतभेद नभएको स्पष्ट पारेका छन् । उनले ११ लाखको अग्रिम रकम १५% ब्याजसहित फिर्ता गरेको र थप रकम पनि तिरेको बताइएको छ । परेशको टिमले सुटिङको पूर्ण तालिका नभएको र प्रोमो सुटिङमात्र भएको दाबी गरेको छ ।
‘हेराफेरी ३’ को विवादले अक्षय र परेशबीचको लामो मित्रतामा दरार ल्याएको देखिन्छ, तर अक्षयले परेशप्रति सम्मान व्यक्त गरेका छन् । यो मामिला अब अदालतमा पुगेको छ र फ्यानहरू यो प्रिय फ्रान्चाइजीको भविष्यबारे चिन्तित छन् । यता, ‘हाउसफुल ५’ को ट्रेलरले अक्षयको कमेडी अवतारलाई फेरि चर्चामा ल्याएको छ ।
