फिल्म । गुरुङ फिल्मका ‘गडफादर’का रूपमा परिचित कलाकार तथा निर्देशक माओत्से गुरुङको निर्देशन तथा लगानीमा तयार भएको फिल्म ‘पेन्सन पट्टा’ को घरेलु बक्स अफिसमा सुरुआती व्यापार सुस्त देखिएको छ । ठूलो स्टारकास्ट रहेको यस फिल्मले पहिलो साताको शुक्रबार र शनिवार अपेक्षाअनुसार दर्शक आकर्षित गर्न सकेको छैन।
बक्स अफिस स्रोतका अनुसार फिल्मले प्रदर्शनको सुरुआती दुई दिनमा घरेलु बजारबाट कुल ५३ लाख रुपैयाँको ग्रस कमाइ गरेको छ । यस अवधिमा देशभरका हलहरूबाट १५ हजार ४ सय टिकट बिक्री भएका छन्।
माओत्से गुरुङ फिल्म्सको ब्यानरमा निर्माण भएको यस फिल्मको कथा स्वयम् निर्देशक गुरुङले लेखेका हुन् । फिल्ममा दयाहाङ राई, सुनिल थापा, पशुपति राई, गौमाया गुरुङ, बुद्धि तामाङ, विल्सन विक्रम राई, राज थापा काउछा, र लुनिभा तुलाधर लगायतका चर्चित कलाकारहरूको मुख्य अभिनय रहेको छ। सुरुआती दुई दिनको व्यापार सुस्त रहे पनि आगामी दिनमा ‘माउथ पब्लिसिटी’का आधारमा व्यापारमा सुधार आउने अपेक्षा निर्माण पक्षले गरेको छ।
