फिल्म । बुद्ध जयन्तीको अवसर पारेर गत जेठ १० गतेबाट रिलिज भएको फिल्म ‘फर्की फर्की’ले नेपालसंगै डायस्पोरामा समेत राम्रो व्यापार गरिरहेको छ । अस्ट्रेलिया र न्युजिल्यान्डमा पहिलो तीन दिनमा बक्सअफिसमा एक करोड बढीको ग्रस कलेक्सन गर्न सफल फिल्मको जापानमा हुने शोमा अभिनेता अनमोल केसी सहभागी हुने भएका छन् ।
निर्माता रोहित अधिकारीले आगामी जुन ९ तारिखका दिन टोक्योस्थित नाकानो जिरो हलमा अनमोलको उपस्थितिमा ‘रेड कार्पेट प्रिमियर’ हुने जानकारी दिए । उनले भव्य र सभ्य बनाउन स्थानीय वितरकले काम सुरू गरिसकेको बताए । त्यहाँ तीन हजार ऐन टिकेट राखिएको छ भने विद्यार्थीलाई पच्चीस सय ऐन राखिएको छ ।
फिल्मलाई जापानमा प्रदर्शन गर्ने अधिकारी सुवास लामिछानेले लिएका छन् । उनले यसअगाडि जापानमा ‘कृ’,‘कबड्डी ४’,‘बोक्सीको घर’ जस्ता फिल्मको प्रदर्शन गरिसकेका छन् । नेपाली फिल्मलाई जापानमा नियमित प्रदर्शनको लागि पहल गरिरहेका सुवासले ‘कबड्डी ४’ को शोमा सत्र सय दर्शक आएको जानकारी दिए । उनले अनमोलको जापानमा रहेको मागका कारण आगामी जुन ९ मा हुने शोमा पन्ध्रसय बढी दर्शक आउने विश्वास व्यक्त गरे ।
‘अनमोलको यहाँ माग धेरै छ । फिल्मको प्रिमियरलाई सभ्य र भव्य बनाउन हामीले तयारी थालिसकेका छौँ । नेपालीसँगै अन्यले पनि नेपाली फिल्मको विषयमा जानकारी पाउने गरी इभेन्ट गर्ने तयारीमा छौँ’, वितरक लामिछानेले भने ।
रोहित अधिकारीको निर्माण र सुयोग गुरुङको लेखन तथा निर्देशन रहेको फिल्म ‘फर्की फर्की’मा अनमोल केसी, जसिता गुरुङ, निर्मल शर्मा, लोकेन्द्र लेखक, सलोन बस्नेत, रवि काफ्ले र समृद्धि अर्याललगायतको अभिनय छ ।
