फिल्म । फिल्म ‘बोक्सीको घर’को सिक्वेल बन्ने घोषणा गरिएको छ । बिहीबार काठमाडौंमा आयोजित पत्रकार सम्मेलनमा निर्माता केकी अधिकारीले हलमा ‘टु बि कन्टिन्युड’ (निरन्तर रहनेछ) वाक्यांश राखिएको फिल्म शुक्रबारदेखि देखाइने बताइन । उनले पहिलो भागको सफलता र प्राप्त प्रतिक्रियाले आफूसहित टिमलाई सिक्वेलमा आगाडि बढ्न मदत पुगेको बताइन ।
‘हामीलाई पहिलो भागको सफलताले स्रोत र साहस मिलेको छ । यसकारण हामीले सिक्वेल तयार गर्नेमा अलमल छैन’, अभिनेत्री अधिकारीले भनिन् । त्यसो त निर्देशकसँगै लेखक रहेका निर्देशक सुलक्षण भारतीले अभिनेत्री अधिकारीलाई पहिले सिक्वेल सुनाएका थिए । नाटकलाई पुनः फिल्ममा ल्याउनु भन्दा पनि नाटक सकिएको दृश्यबाट फिल्म सुरू गर्न चाहन्थे । यद्यपि अभिनेत्री अधिकारीले नाटकलाई नै फिल्ममा ल्याउने तयारी गर्न आग्रह गरिन् ।
‘स्क्रिप्ट लेखन सकिइसकेको छ । मैले पहिले लेखेको थिएन । यद्यपि यो प्रदर्शन नभई वा यसको व्यावसायिक पक्षसँग जानकार नभई सिक्वेलको आइडिया फिल्ममा राखेनौँ । यद्यपि हामीले फिल्ममा खुल्ला अन्त्य राखेका छौं’, निर्देशक भारतीले भने । तर, उनले एउटा फिल्म गरेर मात्र बोक्सीको घरको सिक्वेल बनाउने बताए ।
पहिलो विकेन्डमा फिल्मले गरेको व्यापार र दर्शकले दिनुभएको ‘वर्ड अफ माउथ’ का कारण यो फिल्म देशभर प्राप्त शोमा उच्च अकुपेन्सीसहित प्रदर्शन भइरहेको छ ।
सुलक्षण भारतीको लेखन तथा निर्देशन रहेको फिल्ममा केकी अधिकारी मुख्य भूमिकामा छिन् । सामाजिक थ्रिलर जनरामा निर्माण भएको फिल्ममा सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोलालगायतको अभिनय छ ।
