फिल्म । विश्वको सर्वोच्च शिखर सगरमाथा आरोहणको ऐतिहासिक कथामा आधारित हलिउड फिल्म ‘तेन्जिङ’को ट्रेलर सार्वजनिक भएको छ। फिल्ममा सन् १९५३ मा पहिलोपटक सगरमाथाको सफल आरोहण गर्ने तेन्जिङ नोर्गे शेर्पा र एडमन्ड हिलारीको कथा प्रस्तुत गरिएको छ। फिल्मको छायांकन नेपालमा समेत गरिएको छ। नेपाली अभिनेत्री थिन्ले ल्हामो पनि फिल्मको प्रमुख भूमिकामा छिन्।
ट्रेलरमा विलेम डिफोले ब्रिटिस आरोहण अभियानका नेता जोन हन्ट र टम हिडल्स्टनले न्युजिल्यान्डका आरोही एडमन्ड हिलारीको भूमिका निर्वाह गरेका छन्। तेन्जिङ नोर्गेको भूमिकामा गेन्डेन फुन्त्सोक देखिएका छन्।
फिल्मले सगरमाथा आरोहणको अभियानसँगै तेन्जिङ नोर्गेको व्यक्तिगत सपना र आध्यात्मिक आस्थालाई समेत प्रस्तुत गरेको छ। कथाअनुसार तेन्जिङलाई उनकी पत्नी दावा (थिन्ले ल्हामो)ले आरोहणका लागि प्रोत्साहन गर्छिन्। त्यसपछि उनले अभियानकी सचिव जिल हेन्डरसन (क्याट्रिओना बाल्फ)को साथ पाउँछन्। दावा र जिलले जोन हन्टलाई तेन्जिङलाई ब्रिटिस आरोहण टोलीमा सहयोगीका रूपमा मात्र नभई आरोहीकै रूपमा सहभागी गराउन मनाउँछन्।
सगरमाथा आरोहणको कथासँगै फिल्ममा फरक पृष्ठभूमि, वर्ग र व्यक्तिगत महत्वाकांक्षाबीचको द्वन्द्वलाई पनि प्रस्तुत गरिएको छ। हिमालको उचाइमा पुगेपछि पद, हैसियत र व्यक्तिगत महत्वाकांक्षाभन्दा माथि उठेर तेन्जिङ र हिलारीबीच विकास हुने पारस्परिक सम्मान र विश्वासलाई कथाको महत्वपूर्ण पक्ष बनाइएको छ।
फिल्मको निर्देशन अस्ट्रेलियन निर्देशक जेनिफर पिडमले गरेकी हुन्। उनले यसअघि सन् २०१५ मा ‘शेर्पा’ नामक वृत्तचित्र निर्देशन गरेकी थिइन्। उक्त वृत्तचित्र बाफ्टा अवार्डका लागि समेत मनोनयनमा परेको थियो।
‘तेन्जिङ’ अक्टोबर ९ देखि हलमा प्रदर्शनमा आउनेछ। प्रदर्शनको एक सातापछि फिल्म एप्पल टीभी प्लसमा स्ट्रिमिङ हुनेछ। त्यसअघि फिल्म विभिन्न अन्तर्राष्ट्रिय फिल्म फेस्टिभलमा समेत प्रदर्शन हुँदैछ।
