फिल्म । आगामी माघ २३ गतेदेखि प्रदर्शन हुने फिल्म ‘रमिताको पिरती’ सार्वजनिक ट्रेलरका कारण चर्चामा छ । नेपाली फिल्ममा प्राय लिड रोल अभिनेताको हुने गर्छ तर उक्त चलचित्रको विषय रमितामा केन्द्रीत छ । साचो पिरतीको खोजीमा रहेकी रमिताको जीवनमा आउने उतारचढाव फिल्मको विषय हो । फिल्ममा रमिताको भूमिका आना शर्माले निर्वाह गरेकी छिन् । उनीसँगै फिल्ममा धिरज मगर र विनय श्रेष्ठको अभिनय रहेको छ । यसै फिल्ममार्फत गायक समीर श्रेष्ठले पनि अभिनय यात्राको सुरुआत गरेका छन् । यी तीनकै सेरोफेरोमा फिल्म घुमेको छ ।
फिल्ममा आना अभिनेत्री मात्र नभई कार्यकारी निर्माताको भूमिकामा पनि छिन् । महिला केन्द्रीत फिल्ममा पहिलोपटक देखिएकी आनाले ब्रेकअपपछि आफूलाई चिन्ने, स्वीकार्ने र रोज्ने एउटा भावनात्मक यात्राको कथा फिल्ममा रहेको बताइन ।
‘रमिता पात्रको भावनात्मक यात्रालाई केन्द्रमा राखेर कथा अघि बढाईएको छ । फिल्म ब्रेकअपबाट सुरु भए पनि यो केवल ब्रेकअपको कथा मात्र नभई, त्यसपछिको आत्मखोज, आत्मसम्मान र आत्मस्वीकृतिको यात्रा हो । हामीले नियमित फिल्म भन्दा केही फरक रुपमा फिल्म तयार गर्ने कोसिस गरेका छन्’, आनाले भनिन् ।
उनले यस फिल्ममा देखिएको पात्र ‘रमिता’ लाई तयार गर्न निर्देशक सुदिप्ताको साथ लिएकी थिइन् । ‘मैले छ महिना निर्देशकसँग बसेर उक्त पात्रलाई डेभलप गरेर, एक्सप्लोर गरेर एडप्ट गरेकी थिएँ, अहिले फिल्म रिलिज हुने बेला आउँदा उत्साहित छु । यो फिल्म, पात्र र भूमिका निकै खास छ, आश छ हामीले देखाएको स्टोरी पर्दामार्फत दर्शकसम्म पुग्ने छ’, उनले भनिन् ।
उनले फिल्म निर्माणको सुरुआतमा कलाकारका रूपमा मात्र स्क्रिप्ट सुनेर प्रोजेक्टमा आबद्ध भएपनि पछि निर्देशक सुदिप्ता र निर्माता सागर लम्सालसँग नजिकबाट काम गर्दै कार्यकारी निर्माताको भूमिका पाएको बताइन् ।
‘सुरुमा हाम्रो कोर टिम नै सानो थियो । दैनिक मिटिङ, वर्कसप हुँदै सँगै निर्णय लिने अवस्थामा पुग्यौं । निर्माता सागरजीले म माथि विश्वास गरेर एक्जिक्युटिभ प्रोड्युसरको जिम्मेवारी दिनुभयो, जुन मेरो लागि सिकाइको ठूलो अवसर बन्यो’, उनले भनिन् । उक्त भूमिकाले आफूलाई नयाँ किसिमको चाँप र रचनात्मक स्वतन्त्रता दुवै दिएको आना बताउँछिन् । ‘जिम्मेवारी धेरै हुन्छ, तर क्रिएटिभ फ्रिडम पनि उत्तिकै रमाइलो रहेछ,’ उनले आफ्नो अनुभव सुनाइन् ।
फिल्मले विशेषगरी युवा पुस्ता, युवतीहरूलाई लक्षित गर्दै महत्वपूर्ण सन्देश दिने शर्माको विश्वास छ । ‘पहिला आफूलाई माया गर्नुपर्छ, आफूलाई केयर गर्नुपर्छ, अनि मात्र अरूलाई माया दिन सकिन्छ भन्ने सन्देश फिल्मले दिन्छ’, उनले भनिन् ।
सोसल मिडियाको प्रभाव, बाह्य भ्यालिडेसनको खोजी र त्यसले व्यक्तिको मानसिक अवस्थामा पार्ने असरलाई पनि फिल्मले चित्रण गर्ने उनले बताइन् । रमिताको पात्र पनि एक चरणमा अरूको स्वीकृतिमा निर्भर हुने देखाइन्छ, जुन आजको पुस्तासँग गहिरो रूपमा सम्बन्धित रहेको उनको भनाइ छ ।
फिल्ममा समिर र आनाले निभाएका पात्रहरूको प्रेम सम्बन्धलाई गीतमार्फत प्रस्तुत गरिएको छ । ती गीतहरू प्रेमको सुरुआती चरण र पात्रहरूबीचको कनेक्सन देखाउन केन्द्रित छन् । आनाको लागि ‘रमिताको पिरती’ विशेष हुनुका तीन कारण छन् । पहिलो यो पूर्ण रूपमा महिलाको कथा हो, दोस्रो महिला निर्देशकद्वारा लेखिएको र निर्देशित फिल्म हो र तेस्रो उनले पहिलो पटक कार्यकारी निर्माताको भूमिकामा काम गर्न पाएकी छन् ।
फिल्म ‘रमिताको पिरती’ को टिजर र गीतहरू सार्वजनिक भइसकेका छन् भने निर्माण पक्षले दर्शकहरुलाई फिल्मलाई धेरै माया दिन आग्रह गरेको छ । फिल्ममा धीरज मगर, विनय श्रेष्ठ, गौमाया गुरुङ, पशुपति राई, रेनु योगीत, गियना, थिन्ले लामो लगायतका कलाकारको पनि अभिनय रहेको छ । फिल्मको पटकथा निर्देशक सुदिप्ताले नै लेख्नुभएको हो । शिशिर विशङखेले छायाङ्कन, सुनिल सिवाकोटीले सम्पादन र कृतिका बरालले नृत्य निर्देशन गरेकी हुन् । निर्माण पक्षका अनुसार फिल्म आगामी माघ २३ गतेदेखि प्रदर्शनमा आउनेछ ।
सेरो फिल्मस्को प्रस्तुतिमा निर्माण भएको फिल्मका कार्यकारी निर्माता सन्तोष लम्साल रहनुभएको छ भने आरपी प्रोडक्सन एसोसिएट निर्माता रहेको छ । निर्देशकसमेत रहेका सुवास कोइराला सह निर्माताका रूपमा आबद्ध छन् । फिल्मका निर्माता सागर लम्साल हुन् । फिल्ममा सुशान्त केसी, समीर श्रेष्ठ, महेश काफ्ले, अस्मिता अधिकारी र कुशल पोखरेलको संगीत रहेको छ । फिल्मको वितरण काठमाडौं उपत्यकामा रिच इन्टरटेनमेन्ट र एप्पल इन्टरटेनमेन्टले गर्नेछन् भने उपत्यका बाहिर एफडी कम्पनीले वितरण गर्नेछ ।
