फिल्म । नेपालको पूर्वी पहाडी जिल्ला इलाममा नेपाली फिल्म ‘मैझारो’को छायांकन साउन १ गतेदेखि औपचारिक रूपमा सुरु भएको छ । अभिनेता विल्सन विक्रम राई, जो ‘तक्मेबुढा’ नामले चर्चित छन्, निर्देशनमा डेब्यु गर्दै यो फिल्मको निर्माण थालेका छन् ।
‘मैझारो’को छायांकन इलाम र पाँचथर जिल्लाका विभिन्न स्थानहरूमा हुने जनाइएको छ । फिल्ममा पूर्वी पहाडको जीवनशैली, संस्कृति र सामाजिक यथार्थलाई आधार बनाइएको निर्देशक राईले बताए । कथा, पटकथा र निर्देशन उनी आफैंले गरेका छन् ।
फिल्ममा धिरज मगर, मिरुना मगर, दिया पुन, सुनिल थापा, कविता आले, पुस्कर गुरुङ, अभयराज बराल, उदय सुब्बा, बुद्धि तामाङ, रजनी गुरुङ, विशाल लिम्बू र सुभाष सिंह ठकुरी लगायत कलाकारहरूको अभिनय रहनेछ । संगीत अनमोल गुरुङ र तोरेम्पा हाङ राईले संयोजन गर्नेछन् भने गायक राजेश पायल राई, अस्मिता अधिकारी, झुमा लिम्बू, अनमोल गुरुङलगायतले स्वर दिनेछन् ।
छायांकनको जिम्मा सौरभ लामाले सम्हालेका छन् । ‘तक्मे प्रोडक्सन’को ब्यानरमा निर्माण हुने यो पहिलो फिचर फिल्म हो । यसअघि कम्पनीले हास्य र सांगीतिक सामग्रीमात्र उत्पादन गर्दै आएको थियो ।
