फिल्म । आउँदो कात्तिक ३० गतेलाई प्रदर्शन मिति घोषणा गरिएको फिल्म ‘मिसिङ: केटी हराएको सूचना’ को प्रदर्शन स्थगित गरिएको छ । यसका वितरक मध्येको एक कम्पनि रीच इन्टरटेन्मेन्टका प्रमुख करण श्रेष्ठले प्रदर्शनरत फिल्म ‘पूर्ण बहादुरको सारङ्गी’ले अभूतपूर्व व्यापार गरिरहेको र नयाँ फिल्म आउँदा शो बाँडफाँडमा समस्या हुने भएका नयाँ मिति सार्वजनिक नभएसम्मका लागि प्रदर्शन स्थगित गरिएको जानकारी दिए ।
उनले भने, ‘जुन प्रकारले ‘पूर्ण बहादुरको सारङ्गी’ले दर्शकको साथ पाएको छ, यो अवस्थामा नयाँ चलचित्र आउँदा चलचित्र घरहरुले नयाँ चलचित्रलाई समेत शो बाँडफाँट गर्नुपर्ने अवस्थाको सृजना हुने हुँदा दर्शकको साथ प्राप्त चलचित्र समेतलाई असर पर्ने सम्भावना रहने भएकोले इतिहास कायम गर्ने बाटोमा रहेको चलचित्रलाई सहज बनाइदिनु हाम्रो दायित्व हो भन्ने मान्यता कायम राख्दै ‘केटी हराएको सूचना’को प्रदर्शन हाललाई स्थगित गरिएको जानकारी गराउन चाहन्छौं ।’
अब कात्तिक ३० गते फिल्म ‘ह्रस्व दीर्घ’ एकल प्रदर्शन हुनेछ । दीपेन्द्र गौचनको लेखन, निर्माण तथा निर्देशनमा तयार भएको फिल्ममा नाजिर हुसेन, सृष्टि श्रेष्ठ सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, अर्जुन पोखरेल लगायतको अभिनय छ भने अमितेष शाह विशेष भूमिका छन् ।
