संगीत । ‘तिम्रो मन बदलिए छ’ यो गीत झन्डै २ दशक अगाडीको सफल गीत हो । गीतका गायक , गीतकारसंगै संगीतकार समेत रहेका यश कुमारको सांगीतिक यात्रालाई अगाडी बढाउन मदत गरेको गीत हो यो । यसगीतलाई उनले सपनाश्रीसँग गाएका थिए । क्यासेट किन्नु पर्ने उक्त समयमा यो गीत ‘तिम्रो मन बदलिएछ’ धेरै श्रोताले रुचाएको गीत हो । आज पनि उत्तिकै कर्णप्रिय लाग्ने यसगीतलाई यश कुमारले पुनः दर्शक र श्रोतासामु ल्याएका छन् ।
गीतमा यसपटक यशलाई साथ् दिएकी छिन् , मिलन नेवारले । यसपटक गीतसंगै यसको भिडियोलाइ पनि उत्तिकै सशक्त बनाइएको छ । सार्वजनिक गीतको भिडियोमा सागर लम्साल ‘बले’, प्रिज्मा र प्रिन्सी खतिवडाले अभिनय गरेका छन् । गीतको भाव अनुसार त्रिकोणात्मक प्रेम कथामा रहेर गीतको भिडियोलाई निर्देशक निकेश खड्काले तयार पारेका छन् ।
उनकै कन्सेप्ट र स्क्रीनप्ले समेत रहेको गीतको भिडियोलाई दर्शकले रुचाएका छन् । निकेशले आफुलाई सकारात्मक प्रतिक्रियाहरु प्राप्त भईरहेको जनाए । ‘मलाइ देशसंगै विदेशबाट पनि उत्तिकै प्रतिक्रियाहरु आइरहेका छन् ,’उनले भने ,’मैले चुनौतीसंगै पाएको अवसरमा गीतको भावलाई भिडियोमा उतार्न सफल भए जस्तो लाग्यो ।’ श्रोताको मनमा बसिसकेको गीत भएकाले यसको भिडियोलाई कन्भिन्स हुने गरि तयार गर्नु पर्ने चुनौतीलाई निर्देशक खड्काले राम्रोसँग बुझेका थिए ।
‘मेरो मात्र होइन, जसले यो गीत सुन्नुभएको, मन पराउनुभएको छ । सोही कारण २० वर्षअघि जति लोकप्रिय थियो । अहिले पनि उत्तिकै लोकप्रिय छ ।’ यश कुमारले गीतलाई रीमेक गर्नुको कारणबारे बताए । ‘आफू नरहे पनि आफ्नो सिर्जना बाँचिराखोस् भन्ने हरेक सर्जकले चाहन्छ । यो मलाई बचाईराख्ने सिर्जना हो’ उनले भने । बुद्द थापाले छायाँकन गरेको गीतको भिडियोलाई विकास धमलाले सम्पादन गरेका हुन् ।
