डिबीको ‘नियत’ बजारमा

839 Shares

देश । काठमाण्डौमा एक कार्यक्रमको आयोजना गर्दै पत्रकार डिबी खड्काको पुस्तक ‘नियत’को विमोचन गरिएको छ । लामो समयदेखि पत्रकारितामा सक्रिय डिबीले यसमा आफ्नो पत्रकारिताको क्रममा देखेको रङ्गीन दुनियाको अध्यारो पाटोलाई उजागर गर्न खोजेको बताएका छन् । उनले नेपाली मनोरञ्‍जन दुनियाँलाई नजिकबाट नियाल्दा रंगीनभन्दा धेरै फिक्का महसुस गरेको समेत उल्लेख गरे । ‘बाहिरबाट हेर्दा जति चम्किलो छ भित्र त्यति नै अध्यारो’ उनले भने । पुरुषका लागि रंगीन र रोचक रहे पनि महिलाका लागि यो क्षेत्र कहाली लाग्दो रहेको निष्कर्ष उनले निकालेका छन् ।

‘सीमित महिलाबाहेक यस क्षेत्रमा लागेका अधिकांशको अनुहारमा देखिने हाँसोभित्र छुट्टै पीडाको सागरमा रहेको पाएको छु’ उनले भने । महिला कलाकारहरूमध्ये केहीले भोगेको हिंसालाई खड्काले पुस्तकका रूपमा आकार दिएका छन् । सोमबारदेखि बजारमा आएको पुस्तक ‘नियत’ लाई लेखक खड्कासंगै तिन अभिनेत्रीहरु रेखा थापा , स्वस्तिमा खड्का र लक्ष्मी वर्देवाले संयुक्त रुपमा विमोचन गरे । फिल्मी-कलाकारिता क्षेत्रमा देखिएको चम्किलो आवरणभित्रको अँध्यारो पाटोका कथा नियतभित्र रहेको बताइएको छ । विमोचनपछि सञ्चारकर्मीसंग कुरा गर्ने क्रममा अभिनेत्री रेखाले महिला यौन हिँसामा परेको र पुरुष कलाकार आर्थिक रुपमा शोषित भएको बताएकी छिन् ।

समारोहमा बोल्दै रेखाले भनिन्–‘नियतले महिलाहरुमाथि हुने नियतको बिषयमा बोलेको छ र महिला यौन हिंसामा परेका होलान् तर, पुरुष पनि यो क्षेत्रमा पीडित छन्’ रेखाले भनिन् ,’यस क्षेत्रमा आउँदै गरेका पुरुषहरु आर्थिक रुपमा शोषित भएका छन् । म यो बिषयमा पनि पुस्तक बजारमा आओस् भन्ने चाहन्छु ।’ रेखाले पुरुषलाई पनि महिलाले विभिन्न तरिकाबाट हिंसा गरेको बताउदै भनिन्– पुरुष र महिला भनेर छुट्याउनु भन्दा पनि ‘मानव’को रुपमा विश्लेषण गर्नुपर्छ ।’

तस्वीरहरु : आर्यन विमली

कमेन्ट गर्नुहोस्