‘भुइँफुल’ बन्ने

फिल्म । राजधानीमा एक कार्यक्रमको आयोजना गर्दै फिल्म ‘भुइँफुल’ निर्माण हुने घोषणा गरिएको छ । द्वन्द्वकालमा विस्थापित भएर मधेशमा बसोबास गर्न आइपुगेका विभिन्न समुदाय विशेषगरी दलित समुदायमा हुने उतारचढाव तथा राज्यले गरेको विभेदमाथिको कथामा आधारित भएर फिल्म निर्माण हुने भएको हो । नेत्र छन्त्यालको निर्देशनमा बन्ने फिल्मको एक कार्यक्रमका बीच सदाबहार अभिनेत्री करिश्मा मानन्धरले मुहूर्त गरेकी हुन् । सरिता राई प्रस्तुतकर्ता रहेको फिल्मको छायाँकन यही २५ गतेबाट सुरु हुँदैछ । काठमाडौं, धरान र झापामा छायाँकन हुने फिल्मलाई रामेश्वर हुमागाइँले खिच्नेछन् । विनय पौडेलले निर्देशक नेत्रलाई निर्देशनमा सघाउनेछन् । फिल्मको कथा पनि निर्देशक स्वयंको हो । उर्मिला वान्तवा राईको लगानीमा निर्माण हुने फिल्ममा गोविन्द प्रभात, नरेन खड्का, तुलसा थापा, दीपेन्द्र दनौल, चन्दा राईलगायतका कलाकारहरुको अभिनय रहनेछ । अभिनेता समेत रहेका गोविन्दले नै फिल्मका गीतमा कोरियोग्राफी गर्नेछन् । फिल्मका गीतमा रमेश खड्काले संगीत भर्ने जिम्मेवारी पाएका छन् ।