कलाकार संघको महाधिवेशन स्थगित

6 Shares

फिल्म । फर्जी सदस्यता वितरण गरेको उजुरी परेपछि यही चैत २३ गते हुने भनिएको चलचित्र कलाकार संघको महाधिवेशन स्थगित भएको छ । कलाकार सुरज आरडीले वर्तमान कार्यसमितिले गैर कलाकारलाई नयाँ सदस्यता वितरण गरेको भन्दै केही दिन अगाडि काठमाडौं जिल्ला प्रशासन कार्यालयमा मुद्धा दायर गरेका थिए । आइतबार सो मुद्धाको सुनवाई गर्दै दुई पक्षको छलफल निष्कर्षमा नपुगेको भन्दै जिल्ला प्रशासन कार्यालयले अर्को आदेश नभएसम्म संघको अधिवेशन रोक्न आदेश दिएको हो । कलाकार संघको आगामी अध्यक्ष पदको लागि सरिता लामिछाने र लय संग्रौलाले अध्यक्षमा उम्मेदवारी दिइसकेका छन् भने केही पदमा पनि उम्मेदवारी घोषणा भइसकेको छ ।

कलाकार संघको सदस्यता सम्बन्धी नियम मिचेको आरोप लगाउँदै कलाकार आरडीले जिल्ला प्रशासन कार्यालयमा लामिछानेविरुद्ध उजुरी दिएका हुन् । उनले लामिछानेमाथि दुईवटा फिल्ममा मात्र अभिनय गरेर सदस्यता प्राप्त गरेको आरोप लगाएका छन् । संघको नयाँ विधानमा भने पाँचवटा फिल्ममा अभिनय गर्नुपर्ने प्रावधान राखिएको छ । आइतबार विहानदेखि संघको आसन्न अधिवेशनका लागि निर्वाचन समितिले मनोनयन दर्ता गरिरहेको थियो । लगभग २० जनाभन्दा बढीले उम्मेदवारी दर्ता गरिसकेपछि काठमाडौं जिल्ला प्रशासन कार्यालयबाट तत्काल चुनाव स्थगित गर्न आदेश आएको थियो ।

Facebook Comments