फिल्म । आगामी जेठ ८ गतेदेखि प्रदर्शनमा आउने फिल्म ‘काजी’ को ट्रेलर सार्वजनिक भएको छोटो समयमै दर्शकबाट सकारात्मक प्रतिक्रिया प्राप्त भइरहेको छ । भावनात्मक संवाद, पारिवारिक कथावस्तु तथा अभिनेता विपिन कार्की र अभिनेत्री केकी अधिकारीको अभिनयलाई लिएर सामाजिक सञ्जालमा राम्रो चर्चा भइरहेको छ ।
ट्रेलरमा प्रस्तुत प्रेम, विश्वास र सम्बन्धभित्रको द्वन्द्वले दर्शकको ध्यान खिचेको छ । विशेषगरी विपिन कार्कीका भावुक संवाद र केकी अधिकारीको समर्पित पत्नीको भूमिकालाई दर्शकले रुचाएका छन् । सार्वजनिक भएको छोटो समयमै ट्रेलर मुभी चार्टको शीर्ष पाँचभित्र पर्न सफल भएको निर्माण पक्षले जनाएको छ । यसले फिल्मप्रति दर्शकको उत्साह र अपेक्षा बढ्दो रहेको संकेत गरेको छ ।
ट्रेलरमा पारिवारिक सम्बन्ध, प्रेम, त्याग र विश्वासलाई भावनात्मक शैलीमा प्रस्तुत गरिएको छ । विपिन र केकीको केमेस्ट्रीलाई दर्शकले विशेष रूपमा प्रशंसा गरेका छन् । ट्रेलरले प्रेमसँगै सम्बन्ध जोगाउन मानिसले भोग्ने संघर्षलाई पनि मुख्य विषयवस्तु बनाएको संकेत गर्छ ।
ट्रेलरको बलियो पक्ष यसको भावनात्मक प्रस्तुति रहेको प्रतिक्रिया दर्शकले दिएका छन् । संवादहरू बनावटीभन्दा पनि वास्तविक जीवनसँग नजिक महसुस हुने खालका छन् । ग्रामीण तथा मध्यमवर्गीय नेपाली परिवारको परिवेशलाई प्रभावकारी रूपमा चित्रण गरिएको देखिन्छ । संवादअनुसारको छायांकन र ब्याकग्राउन्ड म्युजिकले भावनात्मक दृश्यलाई अझ प्रभावकारी बनाएको छ ।
फिल्ममा विपिन कार्की र केकी अधिकारीसँगै गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम, सन्दीपबाबु लोहनी, रोजी श्रेष्ठ, गंगा शर्मा, नवराज गिरी, बुद्धिसागर खनाल, प्रशंसा सुवेदी, कृतिका शर्मा तथा बालकलाकार दिक्षिता अर्याल लगायत कलाकारको अभिनय रहेको छ ।
रामप्रसाद रिजाल को प्रस्तुति रहेको फिल्म रिजाल एण्ड रिजाल प्रोडक्सनको ब्यानरमा निर्माण भएको हो । फिल्मका निर्देशक लक्ष्मण रिजाल हुन् भने कथा लेखन प्रदीप भारद्वाज ले गरेका छन् । फिल्मका निर्माता नेहान रिजाल र विकाशराज जोशी हुन् भने असिम काफ्ले कार्यकारी निर्माता रहेका छन् ।
फिल्ममा चिन्तन राजभण्डारीको छायांकन, कालीप्रसाद बास्कोटाको संगीत, कविराज गहतराजको नृत्य निर्देशन, ओजस्वी ओझाको प्रोडक्सन डिजाइन, श्याम कुँवरको रंग संयोजन, सागर अर्यालको साउन्ड डिजाइन तथा सुजिल कर्माचार्यको पार्श्व संगीत रहेको छ । यस्तै, प्रकाश हमाल प्रोडक्सन हेड, बिपिन मल्ल सम्पादक तथा बनिश शाह सम्पादन सुपरभाइजर रहेका छन् । श्रीराम बालाजी फिल्मस्ले फिल्मलाई नेपालभर वितरण गर्दैछ ।
