फिल्म । यसवर्षको प्रतिक्षित फिल्म ‘छक्का पञ्जा ५’को पहिलो गीत सार्वजनिक गरिएको छ । ‘बिहे भाको छैन’ बोलको गीतमा फिल्मका मुख्य कलाकार दीपकराज गिरी, वर्षा सिवाकोटी लगायतका कलाकार फिचर्ड छन् । गीतमा सविन सुबेदी र बेनिशा पौडेलले स्वर दिएका छन् । दीपक शर्माको सङ्गीत रहेको गीतको शब्द रचना सङ्गीतकार शर्मा र दीपकले गरेका हुन् । गीतलाई सिनिल छेत्रीले कोरियोग्राफ गरेका छन् ।
फिल्मका कार्यकारी निर्माता निर्मल शर्माले गीतसँगै फिल्मको प्रचारप्रसार सुरु गरिएको जानकारी दिए । फिल्मको छायांकन काभ्रे, सिन्धुली, पोखरा र काठमाडौंमा गरियो । असोजको २४ गते फूलपातिबाट रिलिजमा आउने यो फिल्ममा दीपकराज गिरी, केदार घिमिरे, वर्षा सिवाकोटी मुख्य भूमिकामा छन् । फिल्मले सामाजिक कथालाई कमेडीको शैलीबाट भन्छ । दीपाश्री निरौलाको निर्देशनमा तयार भएको फिल्मलाई आमा सरस्वती मुभिज र आइएमईको प्रस्तुतिमा निर्माण गरिएको हो ।
