फिल्म । लेखक तथा निर्देशक लक्ष्मण सुवेदीको फिल्म ‘सतीदेवी’ को प्रदर्शन मिति घोषणा गरिएको छ । फिल्म साउन ४ गतेदेखि देशब्यापी प्रदर्शनमा आउने निर्देशक सुवेदीसँगै वितरण कम्पनिले जानकारी दिएका छन् ।
नारीप्रधान यस फिल्मको मुख्य भूमिकामा अभिनेत्री मलिका महत छिन् । साथमा रमेश बुढाथोकी, कुलदीप अधिकारी, भोलाराज सापकोटा, सन्दीपबाबु लोहनी, सृजना अधिकारी, हर्षिका वली, मञ्जिला बाँनिया, सुजिता शिवाकोटीलगायत कलाकारहरूको अभिनय छ । दिलासा र साराको प्रस्तुती रहेको फिल्मको निर्मातामा श्रीदेवी, दिलासा र सारा सुवेदी छन् ।
गोल्डेन स्टेट मुभी मेकर्स एलएलसी क्यालिफोर्नियाको सहकार्यमा दिलासा क्रियसन प्रालिको प्रस्तुतिमा निर्माण भएको फिल्ममा निर्देशक सुवेदीकै कथा, पटकथा र संवाद छ । बाबु श्रेष्ठले छायांकन रहेको फिल्मलाई तारा थापा ‘किम्भे’ ले सम्पादन गरेका हुन्।
उपत्यकामा रिच इन्टरटेन्टमेन्ट र उपत्यकाबाहिर एफडी कम्पनीले फिल्मलाई वितरण गर्नेछन् । प्रदर्शन अगावै सहभागी भएका सम्पूर्ण महोत्सवले यसले विधागत रुपमा अब्बल सावित गरेको छ । फिल्मले हालै रामेछापमा सम्पन्न तेश्रो नेपाल ग्रामिण फिल्म फेस्टिभलमा ‘सतीदेवी’ सर्वोत्कृष्ट, लक्ष्मण सुवेदीले सर्वोत्कृष्ट स्कृनप्ले र अभिनेत्री मल्लिका महतले सर्वोत्कृष्ट अभिनेत्री जुरी मेन्सन अवार्ड प्राप्त गरेकी छन् ।
‘सतीदेवी’ ले गत माघ तेश्रो साता सौराहमा आयोजीत सौराह दक्षिण एशियाली फिल्म फेस्टिभवलमा सर्वोत्कृष्ट फिल्म र निर्देशक स्व. शिव रेग्मीको नाममा समर्पित शिव रेग्मी सर्वोत्कृष्ट निर्देशकको अवार्ड जितेको थियो ।
