ओटीटी । नयाँ वर्षबाट ओटीटीबाट प्रसारण भएको वेबप्ले सिरिज ‘यौटा सपनाको अवसान’को लिरिकल भिडियो सार्वजनिक भएको छ । ‘आऊ हजुर आऊ’ बोलको सार्वजनिक गीतमा न्ह्यू बज्राचार्यको संगीत, विप्लल प्रतीकको शब्द र शारदा अधिकारीको स्वर रहेको छ । लिरिकल भिडियोमा मञ्चनको समयका विशेष मुद्रालाई समावेश गरिएको छ । ‘यौटा सपनाको अवसान’ नाटकलाई सिरिजको रुपमा रुपान्तरण गरिएको सिर्जना हो ।
गायिका शारदा अधिकारीले गीतले आफ्ना धेरैवटा सपना एकसाथ पूरा गरेको बताएकी छिन् । डोरेमी संगीत पाठशालाबाट गायनको प्रशिक्षण लिएकी शारदा ११ वर्षदेखि थिएटरमा सक्रिय छिन् । उनले यो गीतले आफ्नो ११ वर्षदेखिको सपना पूरा गरेको बताइन् ।
नाटक गत वर्ष चैत्र १० देखि वैशाख १३ सम्म मण्डला नाटक घरमा मञ्चन भएको थियो । निर्देशक अनुप बरालले निर्देशन गरेको यस नाटकले आर्थिक मन्दीमा फसेको एक परिवारको कथा प्रस्तुत गर्छ । नाटकमा दिया मास्के, दिव्यदेव, मेनुका प्रधान, रोय, विकाश जोशी, शेखर चापागाईंको मुख्य अभिनय रहेको छ ।
