फिल्म । रामबाबु गुरुङ निर्देशित फिल्म ‘फूलबारी’ को फस्टलुक अन्तर्गत पोस्टर सार्वजनिक गरिएको छ । नाम झैँ सार्वजनिक पोस्टरमा कलाकारहरूको फूलबारीनै देख्न सकिन्छ । आउँदो फागुन ५ गतेबाट प्रदर्शनमा आउने फिल्मको पोस्टरमा मुख्य कलाकारहरू विपिन कार्की, दयाहाङ राई, अरुणा कार्की, शिल्पा मास्के, गौमाया गुरुङ र प्रियंका कार्की देखिएका छन् । पारिवारिक सामाजिक कथामा निर्मित फिल्ममा अभिनेता कार्कीले वृद्ध अवकासप्राप्त शिक्षकको भूमिका निर्वाह गरेका छन् ।
यशोदा फिल्मस्को ब्यानरमा निर्माण भएको समाजिक फिल्मको कथा र कन्सेप्ट कमल किशोर मलपानीको हो । उपेन्द्र सुब्बाको पटकथामा विपिन र अरुणाले पाका दम्पतिको भूमिका निर्वाह गरेकाछन् । लोकेन्द्र लेखक, सोमनाथ खनाल, अनुपम शर्मा, मनिष ढकाल, साक्षी सिंह भण्डारी, रुजा राउत, रुपेश दाहाल, सुमित्रा गोम्जा, कायरा कार्कीलगायतको समेत अभिनय रहेको फिल्ममा जोस हेरुमको छायांकन, कालीप्रसाद बाँस्कोटा र अनुपम शर्माको संगीत रहेको छ । मणिराम पोखरेलले कार्यकारी निर्माता रहेको फिल्ममा मनिष ढकाल निर्माताको रुपमा रहेका छन् ।
