फिल्म । बलिउड अभिनेता सलमान खान यतिबेला भारतीय सञ्चारमाध्यममा आफ्नो ‘नेपाली भाइ’को कथाका कारण चर्चामा छन् । सोमबार विभिन्न भारतीय सञ्चारमाध्यमले प्रकाशित समाचारअनुसार सलमानले आफ्नो बाल्यकालको स्मरण सुनाउँदै परिवारमा एक नेपाली भाइ रहेको खुलासा गरेका छन् ।
सलमानका अनुसार, उनको सानो छँदा उनका काकाले टेसु नामका एक नेपालीलाई धर्मपुत्रका रूपमा पालेका थिए । टेसु त्यतिबेला सलमान बस्ने आवासीय भवनको चौथो तलामा घरेलु कामदारका रूपमा कार्यरत थिए । कुनै कारणले टेसुका साहुले उनलाई कामबाट निकालिदिएपछि सलमानका काकाले उनलाई असहाय अवस्थामा फेला पारी आफूसँगै लिएर गएका थिए ।
सलमानले बताएअनुसार, उनका काकाले टेसुलाई इन्दौरमा आफूसँगै राखे र छोरासरह व्यवहार गर्दै जायजेथासमेत प्रदान गरे । सलमानले टेसुलाई आफ्नो भाइको रूपमा उल्लेख गर्दै भने, ‘उनी मेरो परिवारको हिस्सा हुन् ।’ हाल टेसु इन्दौरमै बसोबास गर्छन् र उनले विवाह गरेर तीन सन्तानका पिता बनेका छन् ।
यद्यपि, टेसुको नेपालस्थित परिवार र ठेगानाबारे कुनै जानकारी खुलाइएको छैन । यो कथाले सलमानको परिवारको मानवीय पक्षलाई उजागर गरेको छ र भारतीय सञ्चारमाध्यममा व्यापक चर्चा पाएको छ ।
