देश । नेपाल धितोपत्र बोर्ड (सेबोन) को आज बसेको बैठकले हालै लागू गरिएको १५ मिनेटको औसत गणना विधिलाई तत्कालका लागि स्थगन गर्ने निर्णय गरेको छ । लगानीकर्ताहरूको तीव्र विरोध र दबाबका कारण बोर्डले यो कदम चालेको जनाएको छ । सेबोनले लगानीकर्ताहरूको असन्तुष्टिलाई प्राथमिकता दिइएको संकेत गर्छ ।
बैठक हुने थाहा पाएपछि शनिवार बिहानैदेखि सयौं लगानीकर्ता धितोपत्र बोर्डको परिसरमा जम्मा भएका थिए । उनीहरूले नयाँ विधिका कारण बजारमा पारदर्शिता र निष्पक्षतामा असर पर्ने भन्दै चर्को विरोध प्रदर्शन गरे । बोर्ड भवन बाहिर नाराबाजी र धर्ना दिँदा वातावरण तनावपूर्ण बनेपछि बोर्डले दबाब थेग्न नसकेर स्थगनको निर्णय गरेको हो ।
यो निर्णयसँगै आइतबारदेखि १५ मिनेटको औसत गणना प्रक्रिया लागू हुनेछैन । यसअघिको पुरानो नियमअनुसार अन्तिम कारोबार मूल्यलाई नै बन्द मूल्य मानिनेछ । लगानीकर्ताहरूले यो निर्णयलाई सकारात्मक मानेका छन्, तर बोर्डले दीर्घकालीन रूपमा बजार सुधारका लागि थप छलफल गर्ने प्रतिबद्धता व्यक्त गरेको छ ।
