फिल्म । अभिनयमा सौगात मल्लको आफ्नै छुट्टै पहिचान छ । उनले आफूले पाएको भूमिकालाई जीवन्त बनाउने गरेका छन् । यसैले गर्दा पनि सौगात निर्माता तथा निर्देशकको नजरमा परिरहेका छन् । सफल अभिनेताको सूचीमा पर्ने सौगातलाई प्रायः दर्शकले नाट्य क्षेत्र हुँदै फिल्म क्षेत्रमा भित्रिएको भनेर चिन्छन् । तर, उनको कला क्षेत्रको आगमन रंगमञ्च भन्दा पहिले केही फिल्ममा काम गरेर भएको हो ।
निर्देशक तथा निर्देशक आकाश अधिकारीको फिल्म ‘रणभूमि’ मा उनले पहिलोपटक क्यामेरा फेस गरेका थिए। पहिलोपटक क्यामेरा फेस गरेको फिल्म हेर्न पटक–पटक हल पुगेका सौगातले त्यसपछि ‘दाग’, ‘पन्छी’ जस्ता फिल्ममा पनि अभिनय गरे। तर, आफूमा अभिनेताको कुनै गुण नदेखेपछि थियटरमा अभिनय सिक्ने सोच बनाएर उनी नाटकतर्फ मोडिए। उनले फिल्म ‘लूट’ मा निभाएको हाकु कालेको चरित्र खुबै लोकप्रिय छ। उनी अभिनित पछिल्लो रिलिज ‘कबड्डी ४’मा बमकाजीको चरित्र निर्वाह गरेका सौगातले त्यो चर्चा पाए ।
हाकु काले उपनाम पाएका सौगातले आफ्नो क्यारेक्टरमा जीवन भर्ने कोशिश गरिरहन्छन्। त्यसैले पनि हुन सक्छ, वास्तविकतासँग नजिक रहेर निर्माण गरिने फिल्ममा उनी मेकरको रोजाइमा पर्छन्। आउँदो भदौ महिनामा उनी अभिनित तीन फिल्म प्रदर्शनमा आउँदैछ । यसमध्ये एक हो ,’माईकल अधिकारी’ । भदौ ३ गते प्रदर्शनमा आउने फिल्ममा उनले निम्नवर्गीय व्यक्तिको भूमिका निर्वाह गरेका छन् । उनको श्रीमतीको भूमिकामा छिन् , सृष्टी श्रेष्ठ ।
रञ्जित रौनियार निर्देशित फिल्मको स्क्रीप्ट सौगातलाई निकै मन परेको रहेछ । उनले स्टोरी सुनेर स्क्रीप्ट पढेपछि फिल्म गर्न तयार भएको बताए । ‘निकै फाइन स्क्रीप्ट थियो । यस्तो मैले कमै पाउछु । मेरो क्यारेक्टरसँगै पूर्ण कथा नै स्पष्ट थियो’ उनले भने । त्यसो त सौगातले आफ्नो क्यारेक्टर भन्दा अन्य क्यारेक्टर र स्क्रीप्टमा ध्यान नदिने गरेको गुनासो सुनिन्छ । त्यसैले उनले अभिनय गरेका केहि फिल्महरुमा उनको भूमिका बुलन्द भएता पनि स्क्रीप्ट भने कम्जोर थियो ।
सौगात यसलाई स्वीकारछन् । तर उनी पछिल्लो समय फेरिएका छन् । ‘मलाई स्क्रिप्टभन्दा पनि आफूले गर्ने भूमिका सशक्त हुनुपर्छ भन्ने लाग्थ्यो तर त्यसो होइन रहेछ। कथा बलियो भए मात्र चरित्रको काम नोटिस हुने रहेछ। किनकि मलाई निकै मन परेका र निकै मेहनतले तयार पारेका क्यारेक्टरहरु पनि नोटिस भएका छैनन्। एक किसिमले भन्ने हो भने मैले भूमिका निभाएका हाकु काले र बमकाजी मेरा लागि सजिला क्यारेक्टर हुन्’ सौगातले भने ।
यसकारण पछिल्लो समय उनले क्यारेक्टरसँगै सम्रग प्रोजेक्टलाई ध्यान दिन थालेका छन् । सौगात आफूले निभाउने क्यारेक्टरसँगै स्क्रिप्टमा पनि उत्तिकै ध्यान दिने गरेका छन् । जसले गर्दा उनलाई क्यारेक्टर तयार गर्न पनि मद्दत गर्ने गरेको बताउछन् । उनले माईकल अधिकारीमा निर्वाह गरेको निम्न वर्गीय क्यारेक्टर निर्देशककै अनुसार तयार भएको हो । किनकी सम्पूर्ण कुरा स्क्रीप्ट मै लेखिएको थियो ।
‘क्यारेक्टर यस्तो हुनु पर्छ भन्ने छर्लङ्ग थियो । त्यसैले मैले यसमा क्यारेक्टर निर्माणमा मेहनत गरिन् । त्यसलाई जीवन्त बनाउन गर्ने मेहनत त छ नै’ उनले भने । एउटा राम्रो परिवार हुँदा हुँदै पनि पैसाको अभावले निम्त्याउने परिस्थिति नै फिल्म हो । पैसा र भावना बीचको आन्तरिक द्वन्द्व देख्न पाइने फिल्ममा उनले विवशता हावी भएको बताए । ‘एउटा अभिभावकको दायित्व परिवारलाई सुखी राख्नु पनि हुन्छ । त्यसको लागि नै मेरो क्यारेक्टरले मेहनत गरेको छ । मेरो उदेश्य आफ्नो परिवारलाई खुसी र सुखी बनाउनु हुन्छ’ उनले भने ।
उनकै अनुसार फिल्ममा भावनात्मक सम्बन्धलाई बलियो देखाइएको छ । पैसानै ठुलो सोच्ने अधिकारी दम्पतीले बच्चा दिन तयार हुदैनन् । यसपछि हुने संघर्षले दर्शकलाई छुने उनको बुझाइ छ । पैसाकै लागि आफ्नो कोखमा अरुको बच्चा लिएर जन्माउन् तयार दम्पतीले पछि बच्चा दिन अस्वीकार गर्छन् । त्यसपछि आउने कठिन स्थिति दर्शकको लागि मनोरंजनसँगै सिकाई हुने सौगातको बुझाइ छ । ‘पैसाको अभावले हामीलाई के सम्म गराउन सक्छ ? यो त देखाइएको छ नै साथै हामीले मानवता गुमाउन सक्दैनौ भन्ने संदेश पनि फिल्मी शैलीमै दिन्छ’ सौगातले भने ।
सौगात फिल्ममा पिता समेत बनेका छन् । तर कथा अनुसार उनी बच्चासँग धेरै अट्याचड छैनन् । यद्दपि उनले भावनात्मक रुपमा अभिभावक्त्वलाई महसुश गरे । ‘एउटा परिवारले भोग्ने पिडा र बाच्ने जीवनलाई महसुश गरे । बाल्यकाल गाउँमै बिताएकाले यसलाई नदेखेको होइन । यद्दपि अभिभावक भएर दायित्व बोकेर हुँदा बुझाई भिन्न हुने रहेछ’ सौगातले भने । उनले फिल्मले दर्शकलाई मनोरंजनसँगै सामाजिक संदेश पनि दिने बताउछन् ।
‘हामीले फिल्म मार्फत मनोरन्जनात्मक शैलीमै संदेश भन्नेछौँ । दर्शकले यस्तो गर्दा यस्तो हुनेरहेछ , भन्ने महसुश गर्नु हुनेछ’ सौगातले भने । फिल्ममा सौगात र सृष्टीसँगै अशान्त शर्मा, ऐनी कुँवर, हेमन्त बुढाथोकी, विद्या कार्की, सुजना ढकाल, दिलिप बोहरा लगायतका कलाकारको अभिनय छ । पैसाकै लागि अरुको बच्चालाई आफ्नो रेखदेखमा जन्म दिन दम्पती आमा बुवा बनेपछि बच्चा फिर्ता गर्न नमान्दा आउने द्वन्द्वनै फिल्मको कथा हो। गोपीकृष्ण मुभिजको ब्यानरमा निरक पौडेलले निर्माण गरेको फिल्मलाई रञ्जित रौनियारले निर्देशन गरेका हुन् ।
नयाँ टिमसँग पनि काम गर्न तयार हुने सौगातको भदौ महिनामा तीन फिल्म दर्शकले हेर्न पाउनेछन् । तीनै फिल्ममा उनको क्यारेक्टर फरक छ । परिवेश फरक छ । तर यो योजना अनुसार रिलिज तय भएका होइनन् । ‘फिल्महरु कोरोना भाइरसको महामारीका कारण ढिलाई भएका थिए । प्रदर्शनमा आउँदा उस्तै उस्तै डेट पर्यो । तर दर्शकले मलाई सौगात भन्दा पनि क्यारेक्टरकै रुपमा पाउनु हुनेछ’ उनले भने । फिल्मलाई जीजीए ग्रुपका करण श्रेष्ठले वितरण गर्दैछन् ।
