फिल्म । भारतीय अभिनेता रणवीर सिंह र निर्देशक सञ्जयलीला भन्सालीको जोडी एक समयमा बलिउडको सबैभन्दा रुचाइएको अभिनेता–निर्देशक जोडी मानिन्थ्यो । तर, हालै आएका खबरहरूले यो जोडीको सम्बन्धमा दरार आएको संकेत गरेका छन् । यी दुईले ‘गोलियों की रासलीला-रामलीला’, ‘बाजीराव मस्तानी’ र ‘पद्मावत’ जस्ता सुपरहिट फिल्महरूमा सँगै काम गर्दै दर्शकको मन जितेका थिए । यी फिल्महरूले बक्स अफिसमा तहल्का मच्चाएर थुप्रै अवार्ड पनि जितेका थिए ।
फ्यानहरू यो जोडीलाई फेरि सँगै देख्न आतुर थिए, तर पछिल्लो खबरले उनीहरूको मन दुख्ने निश्चित छ । भन्सालीको आगामी फिल्म ‘लभ एण्ड वार’मा रणवीरलाई मुख्य भूमिका नदिइएपछि यो विवाद उत्पन्न भएको हो । यो फिल्ममा रणवीरले मुख्य भूमिका पाउने अनुमान गरिएको थियो, तर भन्सालीले रणवीर कपूर, आलिया भट्ट र विक्की कौशललाई मुख्य भूमिकामा कास्ट गरेका छन् ।
रणवीरले भन्सालीसँगको आफ्नो पुरानो सहकार्य र तीनवटा सुपरहिट फिल्मको इतिहासलाई ध्यानमा राख्दा यो निर्णयले उनलाई चोट पुगेको बताइएको छ। यो मनमुटावको परिणामस्वरूप रणवीरले आफ्नो ४०औं जन्मदिन (जुलाई ६, २०२५) मा आयोजित निजी पार्टीमा भन्सालीलाई निम्तो नदिएको खबरले पनि उनीहरूबीचको तनावलाई पुष्टि गरेको छ । अहिलेसम्म रणवीर सिंह र सञ्जय लीला भन्सालीले यो विषयमा कुनै आधिकारिक बयान दिएका छैनन् ।
कामको कुरा गर्दा, रणवीर सिंह हाल आदित्य धरको एक्सन ड्रामा ‘धुरन्धर’मा व्यस्त छन्, जसको पहिलो लुक उनको जन्मदिनमा सार्वजनिक भएको थियो ।
