फिल्म । सिमोस सुनुवारको निर्देशनमा निर्माण हुने फिल्म ‘जन्ते बाख्रो’मा अभिनेता आशिफ शाह अनुबन्धित भएका छन् । यसअघि नै मुख्य भुमिकामा अभिनेता सौगात मल्ल अनुबन्धित भएका फिल्ममा आशिफले पनि महत्वपूर्ण भूमिका निर्वाह गर्नेछन् । ‘कर्कश’,‘लभ सासा’,‘दुई रुपैयाँ’ जस्ता फिल्ममा अभिनय गरेका आशिफले केही समयको अन्तरालमा फिल्ममा अभिनय गर्न लागेका हुन् ।
यसको छायांकन तिहार पश्चात गर्ने तयारी निर्माण कम्पनिको छ । फिल्मको मुख्य अभिनेत्री लगायतका केही कलाकारका लागि अडिसन आव्हान गरिएको छ । जसको छनोट काम केही दिनमा सुरु हुने निर्देशक सिमोसले बताए ।
फिल्मको कथा, पटकथा तथा संवाद प्रदीप भारद्धाजले लेखेका हुन् । कमेडी कथावस्तुमा ‘जन्ते बाख्रो’ निर्माण हुन लागेको शीर्षकले बुझाउँछ । बेहुली भित्र्याउने दिन जन्तीलाई खुवाइने भोजलाई जन्ते बाख्रो भन्ने चलन छ । यसको कथावस्तु यसैको वरिपरि आधारित रहने बुझ्न सकिन्छ ।
मुईन इन्टरटेनमेन्टको ब्यानरमा निर्माण हुने फिल्ममा सन्तोष गौतम र निर्देशक सिमोस सुनुवारको लगानी रहनेछ । यसको छायांकन हरि हुँमागाईले गर्नेछन् ।
