अनिल सिंह : गीतसंगीतका ‘रकस्टार’

फिल्म । गीतसंगीतमा अनिल सिंहको आफ्नै पहिचान छ । विशेष गरी पप गायनमा उनको नाम चर्चामा रहन्छ । झन्डै डेढ दशक अगाडि मात्र फर्किने हो भने उनले गाएका गीतसंगीतमा नझुम्ने कमै थिए, जसमा अहिले पनि कमी पाइएको छैन । उनले गीत गाउँदै गर्दा आफूलाई स्थिर बनाउन सक्ने संगीत प्रेमी दर्शकनै छैनन् भन्दा पनि फरक पर्दैन। किनकि उनको गायन शैली र गीत नै त्यस्तै छ । तत्कालीन अवस्थामा उनले रकस्टारको ट्याग पाएका थिए। किनकि उनको गीतमा रम्नेमा युवापुस्ता धेरै थिएँ ।

आफै गाउने र कम्पोज गर्ने भएकाले पनि अनिलको छुटै फ्यान फ्लोअर्स छन् । यिनै अनिल केही समयको तयारी पश्चात् गीतसंगीतमा फर्किँदै छन् । केही समय कन्सर्टमा केन्द्रित भएका अनिलले छिटै सार्वजनिक गर्ने गरी अहिले गीतको काम गरिरहेका छन् । ‘रेलिमोई’ बोलको गीतमा अनिलको स्वर मात्र छैन, उनी फिचर्ड पनि छन् ।

साथै, उनले आफ्नो सफल गीत इञ्जिन गाडीमा २ र आइ लभ यु २ गीत छिटै दर्शक समक्ष ल्याउँदै छन् । उनले आफ्नो हिट गीतहरुको नयाँ सिर्जनालाई ‘द ग्रेट हार्मोनिस्ट २’ एल्बममा संग्रहित गर्दैछन् । यसपटक उनले आफ्नै हिट एल्बम ‘द रियल हार्मोनिस्ट’ कै नाम सापटी लिँदै एल्बम नौ तयार गर्न लागेका हुन् । ‘गीतसंगीतसँगै अन्य कामहरू पनि छन् । सबै योजना अनुसार नै अगाडि आउने छन्’ अनिलले भने । उनले गीतसंगीतको बदलिँदो ट्रेन्डलाई अध्ययन गर्न जरुरी रहेको सुनाए । उनी यसकै लागि केही समय कन्सर्टमा मात्र केन्द्रित भएको समेत बताए ।

उनले आफ्नो हिट गीत इञ्जिन गाडीमा र आइ लभ यूलाई कन्सर्टमा मात्र प्रस्तुत गर्ने भएका छन् । कन्सर्टमा गीत सुनिएपछि मात्र भिडियोमार्फत गीत सार्वजनिक गरिने छ । ‘इञ्जिन गाडीमा पार्ट २ टुर’ मा उनीसँगै ब्यान्ड रहनेछ । उनीहरूले उपत्यकाको भिडभाड हुने क्लबहरुमा कन्सर्ट गर्नेछन् । उनको ब्याण्डमा भोकलिस्ट अनिल स्वयम् छन् भने किबोर्डमा सुनिल सिंह, लिड गीतारिस्टमा अनिश मानन्धर, बेस गीतारिस्टमा सन्दीप गुरुङ्ग, ड्रमरमा प्रज्वल निर्वाण रहेका छन् ।

गीत सुन्न आइपुगेका दर्शक तथा श्रोतालाई रियालिटी फिल्म होस् भनेर उनले ब्याण्डसँग कन्सर्ट गर्न लागेका हुन् । उनी युरोप र दुबईमा छिटै कन्सर्ट गर्दैछन् भने क्यानडा र अष्ट्रेलियाको लागि पनि तयारी छ । केही समय स्टेजमा मात्र सीमित भएका अनिल अब गीतसंगीतसँगै स्टेजमा व्यस्त हुने योजना अनुसार अगाडी बढिरहेका छन् । ‘हामीले एउटा समयमा गरेको कामसँगै अहिले अपडेट भएर, ट्रेन्ड बुझेर आउनु पर्छ’ अनिलले भने । उनले आफू गीतसंगीतसँगै अन्य विविध कामहरूमा रहेको पनि बताएका छन् । उनको आइ लभ यु, प्रेम पत्र, डुब्न देऊ, इन्जिन गाडीमा, प्रेमिका, मैले जानी सकेलगायतका दर्जन बढी गीत सुपरहिट छन् ।

यद्यपि ती गीतलाई उनले युट्युबको लागि तयार गरेका थिएनन् । अब उनले युट्युबको लागि कन्टेन निर्माण गर्दैछन् । आफ्नो गीत र गतिविधिलाई जानकारी गराउने उद्देश्यले उनले ‘म्युजिक स्टेट’ नामक च्यानल बनाएका छन् । ‘म युट्युबको लागि नयाँ छु । किनकि यसको लोकप्रियता बढेपछि म गीतसंगीत लिएर आएको छैन । अब भने सक्रियता बढाउदैछु’ उनले भने ।

कमेन्ट गर्नुहोस्