दयाहाङ : ‘काजीको प्रेम यात्रा हो ,कबड्डी’

फिल्म । नेपालमा थोरै यस्ता फिल्म छन् , जसलाई दर्शकले ‘ब्राण्ड’ बनाइदिएका छन् । अर्थात् ती फिल्म प्रति दर्शकको औधि आकर्षण छ । फिल्मको नामले नै एक किसिमका दर्शक हलको टिकेट काउन्टरसम्म आइपुग्ने गर्छन् । यस्तै फिल्ममा पर्छ ‘कबड्डी’ सिरिज । सानो सुरुवातबाट फिल्म यतिबेला नेपालको एउटा ब्राण्ड बनिसकेको छ । फिल्मको घोषणासँगै यसलाई दर्शकले पर्खिरहेका हुन्छन् । ‘कबड्डी’ भन्ने वितिकै सबैले सम्झिने पात्र हो , ‘काजी’ ।

काजीले मैया अर्थात् आफ्नो सोल्टिनी प्राप्तिको लागि गर्ने संघर्षलाई निर्देशक रामबाबु गुरुङले मुस्ताङको स्वादमा ‘कबड्डी’ सिरिजमा पस्किने गरेका छन् । र , उनलाई लेखनमा साथ् दिएका छन् उपेन्द्र सुब्बाले । फिल्मको पात्र र उसले बोल्ने संवादको कारण पनि यो सिरिज दर्शकमाँझ लोकप्रिय छ । यसैको चौथो सिरिज ‘कबड्डी : द फाइनल म्याच’ यसै साता प्रदर्शनमा आउँदैछ । रिलिजपुर्व नै खोलिएको बुकिङमा देखिएको दर्शकको चापले फिल्मले राम्रो व्यापार गर्ने संकेत गरिसकेको छ । दर्शकले फिल्मको प्रतीक्षा गर्दै गर्दा हामीले काजीको उदय र कबड्डी निर्माणको सुरुवाती चरणलाई केलाउने कोसिस गरेका छन् । यसका मुख्य पात्र काजी अर्थात् दयाहाङ राईले ‘कबड्डी यात्रा’ लाई खबरहबसँग साटेका छन् ।

कबड्डीको सुरुवात

फिल्म ‘कबड्डी’ बन्ने समयमा टिम नै नयाँ थियो । दया ‘लूट’ मार्फत चिनिएका थिए । यद्दपी अन्य टिमलाई फिल्म पर्दासम्म ल्याउन सहज थिएन । निर्देशक रामबाबु गुरुङ नयाँ थिए । उनले ‘अनागरिक’ निर्देशक त गरिसकेका थिए तर यसको जानकारी दर्शकलाई थिएन । फिल्मको आइडिया राम्रो भएकाले बनाउने मन त थियो तर समस्या ‘लगानी’ को अभाव । तात्कालिन समयमा रामबाबु , दया र निश्चल बस्नेत प्राय समय मण्डलामा बिताउने गर्थे । एक प्रकारको त्यो ‘जक्सन’ नै थियो । निश्चल र दयाहाङलाई लुटले चिनाएको थियो भने रामबाबु पनि दर्शकलाई नयाँ टेस्टको फिल्म दिन चाहन्थे । तर , एक समयमा पुगेर फिल्म झन्डै बन्द हुने अवस्था थियो ।

दया भन्छन् ‘त्यो बेलामा हामीलाई फाइनान्सको समस्या त थियो नै साथै लगानी कर्ताको लगानी फिर्ता गर्न सकिन्छ कि सकिदैन भन्ने डर पनि ।’ एक समयमा पुगेर त फिल्मको स्क्रिप्ट नै चितबुझ्दो भएँन । ‘हामीले एक जना साथीलाई लेख्न दिएका थियौ तर उँहाले जागर चलाउनु भएँन र झन्डै सात महिना स्टोरीलाई स्क्रिप्ट बनाउन सकिएन’ दयाले भने । त्यो समयमा फिल्म बन्दैन भन्ने पनि लागेको थियो । तर , रामबाबुले उपेन्द्र सुब्बासँग मिलेर स्क्रिप्ट तयार गरे । अब लगानी कर्ताको विश्वासलाई कसरि बचाउने भन्ने चिन्ता बढ्यो । किनकी लगानी मुनाफामा परिणत गर्ने दायित्व टिमले निर्वाह गर्नु पर्ने थियो । ‘हामीलाई दबाब थिएन तर हाम्रो टिमको विश्वासमा लगानी डुब्यो भने डर चाही थियो’ दयाले सुनाए ।

त्यसै बेला निश्चलले सल्लाह दिए ‘मण्डला जसरि बनाउनु भयो कबड्डी पनि त्यसरी नै बनाउ’ । निश्चलको सल्लाहमा सबै सहमत । झन्डै दुइ वर्षको गृहकार्यलाई फिल्मको रुप दिने तय भयो । तर पनि विविध कारणले फिल्म प्राविधिक रुपमा अब्बल बनाउन सकेन टिमले । ‘हामीले कोसिस गर्यौ तर अन्तिममा जे सक्यौ त्यहि गर्यौ’ दयाले भने । केहि प्राविधिकको पारिश्रमिक समेत टिमले रिलिज पश्चात दिने शर्तमा काम गरेको थियो । रिलिजपछि भने फिल्मले लगानीकै दोब्बर मुनाफा कमायो ।


काजीको उदय

फिल्मको स्क्रिप्टसँगै पात्रा काजीको पनि त्यति नै छलफल भयो । दया काजीको पात्रमा थिए । हरेक भेटमा काजीको सोचाई र भोगाईको चर्चा हुन्थ्यो । चर्चा हुन्थ्यो ‘काजी यस्तो हुन्छ , त्यस्तो हुन्छ ।’ दयाले त्यो पल सम्झिदै भने ‘काजी प्रेमी हो तर एकोहोरो किनकी उ हक पनि खोज्दैछ अनि माया पनि ।’ काजीले आफ्नो सोल्टिनीमा हक लाग्ने त सोचेको छ नै साथै मायाको पनि अपेक्षा गरेको दया बताउछन् ।

काजी दयालु छ , मनकारी छ , सोझो छ , निश्चल माया गर्छ तर अनपढ छ अनि एकोहोरो छ जसले मैया अर्थात् सोल्टिनीको भावना भने बुझेन । ‘काजी एकोहोरो छ अनि उसले हकदावी गरिरहेको छ किनकी कल्चर नै त्यस्तै छ’ दयाले पात्रको ब्याख्या गरे । काजी कसरि जन्मियो त ? दया भन्छन् त्यो हाम्रो कथामै थियो । उनले काजी सोचले मात्र बलियो भएको समेत बताए । ‘काजीको परिवार शक्तिशाली भएकै उसको सोच बलियो छ तर यथार्थ फरक छ’ दयाले भने ।

त्यसलाई डेभलप् गर्दै बढ्यौ तर रामबाबु रामबाबु लोकेसन हेर्न जादा त्यस्तै मान्छे भेटेका रहेछन् । ‘मैले त फोटो समेत हेरिन तर उ काजी जस्तै थियो रे’ दयाले भने । तर , क्यारेक्टरको स्वभाव भने सोच नै भएको उनले बताए । रामबाबुले भेटेको काजी र फिल्मको काजीमा धेरै समानता छ । कबड्डी एक प्रकारले काजीको यात्रा रहेको दया बताउछन् । किनकी उसको जीवन र भोगाईसँगै फिल्मको सिरिज अगाडी बढेको छ ।

कबड्डी प्रेम कथा हो

‘कबड्डी विशुद्ध प्रेम कथा हो’ दयाले भने । ‘काजीको प्रेम यात्रा नै कबड्डी हो । काजीको स्वभाव दर्शकलाई कमेडी लाग्न सक्छ । तर , यो उसको निस्वार्थ प्रेममा बुनिएको कथा हो’ दयाले भने । उनले यसकिसिमको प्रेम रियल लाइफमा भएपनि रिल लाइफमा कमै हुने बताए । ‘प्रेम कथा भन्ने वितिकै हामी कहाँ नाच्ने र गाउने शैली छ । त्यो मात्र होइन , प्रेम गर्ने तरिका हरेकको फरक हुन्छ’ उनले भने ।

काजीले माया गर्छ तर मैयाले ‘नजिकको तिर्थ , हेला’ गर्छिन् । तर पनि काजी हार मान्दैन । आखिर किन हरेक सिरिजमा काजीले चेत खाएपनि आफुलाई परिवर्तन गर्दैन त ? यस जिज्ञाषामा दया भन्छन् ‘मायामा परेपछि थोरै भाव देखियो भने पनि आश पलाउछ त्यसमाथि कहिँ त एकोहोरो प्रेमी ,’ उनले थपे ‘सोल्टिनीले आफ्नो माया बुझ्छे भन्ने आशमा छ काजी ।’ तर काजी र मैयाको विचमा विभिन्न अड्चन आउने गरेका छन् । जस्तै , बम काजी वा अन्य तेस्रो पात्र ।

मैया पनि काजी भन्दा तेस्रो व्यक्तिमा आकर्षित हुन्छिन् । ‘सोल्टिनीले काजीको माया बुझ्दिनन् किनकी काजीले त मायासँगै हकदावी पनि गर्ने गरेको छ । अनि जालझेल नजान्ने भएकोले सिधा छ नि’ दया भन्छन् ,’तर जालझेल गर्नेको जालमा सोल्टिनी छिटै फस्छिन् ।’


सिरिजनै किन ?

दयाको भनाइलाई आधार मान्ने हो भने उनिसँगै उनको टिम सिक्वेल वा सिरिजको पक्षमा छैन । ‘कबड्डीमा अन्य कथा पनि भेटिन्छन वा हामीले अर्को कथा पनि भन्न सक्थ्यौ होला तर टिमको निर्णयले नै सिरिज मार्फत कथा भनेका हौ’ दयाले भने । उनले यसलाई आर्थिक मजबुतीसँगै दर्शकको अपेक्षाको रुपमा पनि लिने गरेका छन् । ‘हामीले सुरुवाती दिनमा गरेको लगानी , मेहनतको फल नै होला कबड्डीको सिरिज’ दया भन्छन् ‘तर यसमा दर्शकको चाहना र पर्खाइ पनि कारक छ ।’ यदपि यसपटक कबड्डी ४ लाई फाइनल म्याच भनिएको छ ।

के आउँदा दिनमा काजी पात्रलाई पर्दामा देख्न सकिन्न ? दया भन्छन् , ‘सकिन्छ । तर , उसको जीवनको प्रेमको पाटो भने अब सकियो होला । अन्य पाटोलाई नदेखाउने भन्न सकिन्न ।’ उनले ‘काजीको प्रेम यात्रा’ लाई यसैबाट रोक्ने संकेत गरे । किनकी एउटा पात्रले यत्रो समय एउटै सोचलाई बोकिरहेको छ । ‘सिक्वेलको पात्र डेभलप गर्दा समयसँगै उसले सोच्ने शैली , बुझ्ने जीवन , देख्ने संसार सबैलाई जोडेर अगाडी बढाउनु पर्छ । त्यसैले अब काजी प्रेमलाई कति पर्खिन्छ वा त्यहिँ बाटोमा कति हिंड्छ भन्ने हो’ दयाले भने ।

मित्रताको कथामा आओस् भन्ने चाहना छ

दयाले कबड्डीमा प्रेमसँगै अगाडी बढिरहेको मित्रताको कथालाई जोड्न सकिने संकेत गरे । फिल्ममा दयासँगै विजय बराल र बुद्धि तामाङको मित्रता पनि देखिएको छ । उनीहरुले एक आपसमा हरेक सुख दुखमा सघाउने गरेका छन् । उनीहरु आफ्नो परिवार झैँ एक अर्काको सारथी बनेका छन् । दया काजीलाई प्रेमीसँगै साथी पनि देख्छन । सम्पन्न परिवारको भएकोले काजीले साथीलाई सहयोग पनि गर्ने गरेको छ । ‘कबड्डीमा काजीको मित्रतालाई देखाउ भन्ने लागेको छ । यद्दपी त्यो अहिले होइन । दशकपछि मसँगै विजय र बुद्धिको पात्रलाई पर्दामा ल्याइयोस् भन्ने लागेको छ’ दयाले भने । उनले तीन पात्र र उसले भोगेको समयलाई दशकपछि पर्दामा देखाउदा छुटै आनन्द आउन सक्ने बताए ।

कमेन्ट गर्नुहोस्