देश । बि एण्ड बि टेक ग्रुपले शनिबार काठमाडौंको बालुवाटारस्थित रोयल एम्पायर बुटिक होटलमा आयोजित विशेष समारोहबीच आफ्ना नयाँ व्यावसायिक उद्यमहरूको औपचारिक शुभारम्भ गर्दै ‘तिम्रो टिकट’ नामक ई-टिकेटिङ मोबाइल एप सार्वजनिक गरेको छ । सन् २०१८ मा विद्यालयकालीन साथीहरू डा. विकाश लाम्साल र इन्जिनियर विमलकुमार केसीद्वारा स्थापित बि एण्ड बि टेकले निरन्तर विस्तार र विकासको यात्रालाई अघि बढाउँदै सन् २०२२ मा ‘बि एण्ड बि टेक ग्रुप’का रूपमा पुनःब्रान्डिङ गरेको थियो।
प्रविधि अनुसन्धान तथा विकासका क्षेत्रमा सक्रिय कम्पनीले जापानका प्रतिष्ठित संस्था तथा कम्पनीहरू काजिमा कर्पोरेशन, एनएआइटी कर्पोरेशन र आइबिएमसँग सहकार्य गर्दै अन्तर्राष्ट्रिय स्तरमा आफ्नो उपस्थिति बलियो बनाएको जनाएको छ।
कार्यक्रममा बि एण्ड बि टेक ग्रुपसँगै बि एण्ड बि टेक्निकल रिसर्च इन्स्टिच्युट, फिस्टेल एकेडेमी ब्रिज र हाकिम इन्टरटेन्मेन्टबीचको संयुक्त सहकार्यको औपचारिक घोषणासमेत गरिएको थियो। ती संस्थाहरूले प्रविधि, अनुसन्धान, शिक्षा, सीप विकास तथा मनोरञ्जन क्षेत्रलाई एकै मञ्चमा जोड्दै नेपालमा नवीन अवसर सिर्जना गर्ने लक्ष्य लिएको जनाइएको छ।
विभिन्न क्षेत्रका विशिष्ट व्यक्तित्व, उद्योगी–व्यवसायी, सञ्चारकर्मी, कलाकार तथा युवा उद्यमीहरूको उल्लेखनीय सहभागिता रहेको कार्यक्रमको शुभारम्भ पारम्परिक दीप प्रज्वलनमार्फत गरिएको थियो। कार्यक्रममा सहभागीहरूले नेपाली युवाका लागि प्रविधि, अनुसन्धान, शिक्षा र सिर्जनात्मक उद्योगबीच सहकार्यका नयाँ सम्भावनाहरू खुल्ने विश्वास व्यक्त गरेका थिए।
कार्यक्रमको पहिलो सत्र प्रेरणादायी व्यावसायिक यात्रा र अनुभव आदानप्रदानमा केन्द्रित थियो। बि एण्ड बि टेक ग्रुपका अध्यक्ष तथा सह–संस्थापक डा. विकाश लाम्सालले आफ्नो व्यावसायिक तथा अनुसन्धान यात्राबारे प्रस्तुति दिँदै नेपालदेखि जापानसम्मको संघर्ष, उपलब्धि र अन्तर्राष्ट्रिय अनुभवहरू सहभागीहरूसँग साझा गरेका थिए। उनले अत्याधुनिक प्रविधि, अनुसन्धान र नवप्रवर्तनलाई नेपालमा भित्र्याई देशको विकासमा योगदान पुर्याउने आफ्नो दीर्घकालीन लक्ष्यबारे पनि जानकारी दिएका थिए।
त्यसपछि चर्चित नेपाली र्याप कलाकार सुरेन्द्र गुरुङ (हाकिम)ले फेसन मोडलिङदेखि नेपाली हिप–हप संगीत क्षेत्रमा स्थापित कलाकार बन्ने आफ्नो प्रेरणादायी यात्राबारे अनुभव सुनाएका थिए। उनले निरन्तर मिहिनेत, लगनशीलता र आत्मविश्वासका माध्यमबाट कुनै पनि क्षेत्रमा सफलता हासिल गर्न सकिने सन्देश दिएका थिए।
कार्यक्रमको दोस्रो सत्र विस्तार, सहकार्य तथा भावी योजनामाथि केन्द्रित थियो। फिस्टेल एकेडेमी ब्रिजका प्रमुख सञ्चीव अर्यालले संस्थाको भावी योजना प्रस्तुत गर्दै नेपाली युवाहरूलाई जापानस्तरीय भाषा, सीप तथा व्यावसायिक दक्षतासँग जोड्ने लक्ष्य रहेको बताए। उनले शिक्षा, प्रविधि र उद्योगबीचको सम्बन्धलाई अझ सुदृढ बनाउँदै युवाहरूलाई अन्तर्राष्ट्रिय अवसरसँग जोड्ने प्रतिबद्धता व्यक्त गरे।
कार्यक्रमको मुख्य आकर्षण बि एण्ड बि टेक ग्रुपद्वारा विकसित ‘तिम्रो टिकट’ ई–टिकेटिङ मोबाइल एपको औपचारिक सार्वजनिकरण थियो। कम्पनीका फुल–स्ट्याक डेभलपर आश्विन सुनारले एपका विभिन्न विशेषता, प्रयोगकर्ता–मैत्री डिजाइन तथा नेपालमा टिकट व्यवस्थापनलाई डिजिटल, सुरक्षित र सहज बनाउने उद्देश्यबारे विस्तृत प्रस्तुति दिएका थिए।
उनका अनुसार ‘तिम्रो टिकट’ एपले विभिन्न कार्यक्रम, सांगीतिक कन्सर्ट, खेलकुद प्रतियोगिता, सांस्कृतिक गतिविधि तथा अन्य सार्वजनिक कार्यक्रमहरूको टिकट खरिद र व्यवस्थापन प्रक्रियालाई सरल तथा आधुनिक बनाउनेछ। यसले नेपालमा डिजिटल टिकटिङ संस्कृतिको विकासमा महत्वपूर्ण योगदान पुर्याउने अपेक्षा गरिएको छ।
कार्यक्रमको समापन अन्तरक्रियात्मक प्रश्नोत्तर सत्रमार्फत गरिएको थियो। उक्त सत्रमा सञ्चारकर्मी, उद्योगी–व्यवसायी तथा सहभागीहरूले नवप्रवर्तनशील प्रविधि, ‘तिम्रो टिकट’ एपको भावी विकास, अनुसन्धान तथा विभिन्न संस्थाबीच हुने सहकार्यका सम्भावनाबारे जिज्ञासा राखेका थिए।
आयोजकका अनुसार बि एण्ड बि टेक ग्रुप, बि एण्ड बि टेक्निकल रिसर्च इन्स्टिच्युट, फिस्टेल एकेडेमी ब्रिज तथा हाकिम इन्टरटेन्मेन्टबीचको सहकार्यले नेपालमा प्रविधि, अनुसन्धान, शिक्षा तथा सिर्जनात्मक उद्योगको विकासमा महत्वपूर्ण योगदान पुर्याउने अपेक्षा गरिएको छ। साथै, ‘तिम्रो टिकट’ जस्ता डिजिटल समाधानहरूले नेपालको प्रविधि तथा इभेन्ट व्यवस्थापन क्षेत्रलाई नयाँ उचाइमा पुर्याउने विश्वास व्यक्त गरिएको छ।
