फिल्म । यो वर्ष सन् २०२४ मा सर्वाधिक प्रतीक्षा गरिएको फिल्म हो, ‘पुष्पा २: द रुल’ । सन् २०२१ मा प्रदर्शन भएको यसको पहिलो भाग दर्शक माँझ लोकप्रिय भएपछि यसको दोस्रो भाग प्रतिक्षित बनेको छ । भारतमा व्यापारको नयाँ रेकर्ड बनाउने भनिएको अभिनेता अल्लु अर्जुन अभिनित बहुप्रतिक्षित फिल्म ‘पुष्पा २: द रुल’ को ट्रेलर सार्वजनिक भएसँगै चर्चा झनै बढेको छ ।
फिल्मलाई लिएर सामाजिक सञ्जालमा भएको चर्चा हेर्ने हो भने यसले नेपालमा पनि आक्रामक व्यापारको सुरुआत गर्नेछ । यसको प्रतीक्षा प्रदर्शक र दर्शकलाई उत्तिकै छ । नेपालमा यसलाई महङ्गो मुल्यमा भित्र्याइएको छ भने यो आउँदो डिसेम्बर ५ मै भारतसँगै नेपालमा समेत प्रदर्शन हुनेछ । यसको नेपाल आगमन मुल्य झन्डै ६ करोड नेपाली रहेको चर्चा रहेता पनि यसबारे वितरकले आधिकारिक रुपमा प्रतिक्रिया दिएका छैनन् ।
फिल्मको टिजर, ट्रेलर र सार्वजनिक तीन गीतको लोकप्रियतालाई मापन गर्ने हो भने यसले पहिलो सातामै पन्ध्र करोड बढीको व्यापार गर्ने अनुमान प्रदर्शकको छ । सुकुमारको निर्देशनमा बनेको फिल्म ‘पुष्पा २ : द रुल’ मा अल्लु अर्जुनसँगै रश्मिका मन्दाना र फहद फासिल लगायतका कलाकारको अभिनय रहेको छ ।
