‘कोभिडलाई हल्का नलिनु होला’

फिल्म । अभिनेता तथा नेपाल एयरलाइन्सका वरिष्ठ क्याप्टेन विजय लामाले आफ्नो स्वास्थ्य अवस्थाको बारेमा सामाजिक सञ्जाल मार्फत जानकारी गराएका छन् । कोरोना भाइरस संक्रमणलाई सामान्य रुपमा नलिन आग्रह गर्दै उनले चाँडै उडान भर्ने र बिदेशमा रहेका नेपालीहरुलाई फर्काउने आशा व्यक्त गरेका छन् । स्टार अस्पताल ललितपुरमा उपचाररत क्याप्टेन लामाले कोरोनाविरुद्ध दुई हप्तादेखिको लडाइँमा आफ्नो स्वास्थ्यमा धेरै सुधार भएको जनाएका छन् ।

‘एकदम जटिल अवस्थाबाट पार भै पुनः स्वस्थ बन्दै छु । अबको केही दिनपछि डिस्चार्ज हुने आशा राखेको छु’ क्याप्टेन लामाले फेसबुकमा लेखेका छन्, ‘कोभिडलाई हल्का रुपमा नलिनु होला र सुरक्षामा कतै नचुक्नु होला किनकी यसले ज्यान पनि लिन सक्छ ।’ उनले आफ्नो इन्फेक्सन लेभल घटेको जनाउदै स्टार हस्पिटल टिमलाई धन्यवाद दिएका छन् । ‘…आभारी छु तपाईंहरुको माया, साथ र प्रार्थनाको लागि । चाँडै उडान भर्ने छु र विदेशमा हुनु भएकाहरुलाई नेपाल फर्काउने छु अनि राष्ट्रप्रति समर्पित हुने छु’ क्याप्टेन लामाले लेखेका छन् । उनले आफ्नो भ्ल्ग समेत युट्युबमा सार्वजनिक गरेका छन् ।