फिल्म । कृषा चौलागाइँको निर्देशनमा निर्माण हुन लागेको फिल्म ‘पारस’ मा अभिनेता सुशील श्रेष्ठ अनुबन्ध भएका छन् । निर्माण टिमले बुधबार अभिनेत्री निरुता सिंहलाई अनुबन्ध गरेको थियो। निरुतालाई अनुबन्ध गरेको दुई दिनमै एक्सन स्टारका रूपमा परिचित सुशीललाई पनि फिल्ममा भित्र्याइएको हो।
निर्देशक चौलागाइँले सामाजिक सञ्जालमा सुशीलसँगको तस्वीर सेयर गर्दै फिल्ममा उनको इन्ट्री भएको जानकारी दिएकी छन् । यसअघि फिल्ममा नायकका रूपमा निखिल उप्रेती र नायिकामा जसिता गुरुङ, प्रियंका कार्की र निरुता सिंहलाई पनि निर्माण टिमले अनुबन्ध गरिसकेको छ । यसले निर्देशक चौलागाइँले पछिल्ला नेपाली फिल्मको तुलनामा पारस लाई उत्कृष्ट बनाउने लक्ष्य राखेको संकेत गर्छ।
यसअघि कृषाले सामाजिक कथामा आधारित फिल्म ‘ऐँचोपैचो’ र एक्सन जनराको फिल्म ‘पिताम्बर’ निर्देशन गरिसकेकी छन्। अब उनले आफ्ना अघिल्ला कामका कमजोरी सुधार्दै तेस्रो निर्देशनात्मक फिल्म ‘पारस’ लाई अझ सशक्त बनाउने तयारीमा रहेको बताइएको छ।
प्रेमकथामा आधारित यो फिल्मको पटकथा भारतीय लेखक सचिन लादियाले लेखेका हुन् । लादियाले सन् २०१२ को चर्चित भारतीय फिल्म ‘ग्याङ्स अफ वासेपुर’ भाग १ र २ को पटकथा लेखनमा सहकार्य गरेका थिए । चुनावलगत्तै फिल्मको छायांकन सुरु गर्ने तयारी निर्देशक चौलागाइँको रहेको छ।
